جربت مره أنك تقلع الجزمه
وتمشى ع الشط وأنت حافى
ويغازل فيك الموج الساقع
وهو بيجرى مشتاق للرمل الدافى
جربت تقلع هدومك كلها
وتاخد حمام قمر؟
وتصدق أنك ملك السما والأرض
والزرع والشجر
طب بلاش
جربت مره وأنت وسط ناس مكشره
تحلم أنك نطيت فى قلب المحيط
وفضلت تعوم وتعوم
لحد ما تنزل لتحت فى الغويط
وتطلع من وراك سمكه وتقولك بخ!!
وتفوق وأًنت ميت من الضحك واللى حواليك يقولو
دا يأاما أهبل..يأما عبيط
طب جربت مره تشوف نفسك مارد جسور
عاشق
وعروستك ست بنات الحور
وتاخدها فى ايدك وتلف بيها الكون وتدور
وآخر النهار تحت ضى القمر
تقطفلها من السما حبه نجوم
وتبقى خيبه ومكسوف ومتلاقيش كلام تقوله
غير مقسومه أنتى ليا
وأنا ليكى مقسوم
بلاش
جربت وقت الجد
تقول كلام مجنون
ولما الناس حواليك قلبها يقسى
تفضل أنت قلبك حنون
جربت تعيش فى صحرا لا فيها زرع ولاشجر
وتتعلم تصبر وتستنى
يوم ينزل فيه المطر
طب جربت تمسك مره فرشه ألوان وتبقى رسام
وبدل الصور
ترسم المشاعر المستخبيه بين ثنايا الكلام
جربت تصدق أنك ببساطه تقدر
الكون اللى مليان دمار وضجيج وعذاب
تلونه أنت بألوان السلام
جربت بدل ما تتوقع الشر
تتمنى الخير
وتشتاق لأذان الجامع
ورنه أجراس الدير
جربت مره فى عمرك
وقبل ما العمر بيك يعدى
والقلب نبضه يهدى
جربت مره
أنك تغير خط السير؟
هناك 4 تعليقات:
di hayla bgad ya a7mad..enta mawhoob awy masha2allah bgad..3ala fekra ana mesh beye3gebny ay she3r 3ameyya be sohoola..fa bgad mesh bagamel ya3ni :)) rabena ywaffa2ak we i'm sure ennak hateb2a sha3er kebeer we mash-hoor isA bas eb2a eftekerna ba2a :D :D
D:
Yaah... mesh 2awy keda ya Noha. Thanks a lot wallahy. Really appreciate it
mashaallah, 7elwa awi..gives a nice feeling,i couldnt help but smile while reading it...(-.-)
! Thanks a lot ya Afrah
:)Glad it made you smile
إرسال تعليق