النهارده..ومن غير سبب
أوضتى الضيقه لأول مره
أحسها براح
وكل همى وقلقى
فارقنى فى لحظه
وعقلى أرتاح
وبدل بهتان الحيطان
نطقت فى الأوضه الألوان
وبرغم سنين التوهه والضياع
حسيت انه بقى ليا فى الدنيا دى أسم
لأ وكمان عنوان
وبعد ما كان عالى صوت السكات
قلبى بقى مليان حكايات
قلبى لسه عايش
وبقوه بينبض
ومبقتش حاسس خلاص
أنى من كل شئ خايف
واتمايلت ستاير شباكى لما دخلت نسمه هوا
رقصت كأنها عشقانه وهيمانه بكل خفه ودلع
أأأه يازمن
وأه من القلب اللى يامااتوجع
جيتى منين يانسمه الهوا؟
ولفين الحياه واخداكى؟
أمانه عليكى لو تروحى
خدى كل يأسى وحزنى وأحباطى معاكى
وسمعت مرايتى بتنده عليا
واتاريها عرفتنى!!
برغم كل شئ اتغير فيا
أمال أنا ليه مبقتش عارف نفسى؟
طب أدينى قلعت كل هدومى
أدى عيونى وكتافى وايديا
وأدى قلبى اللى جوه صدرى وآدى رجليا
طب أنا لو لسه ملامحى ملامح أنسان
كان قاسى ليه كده الزمن عليا؟
لأ..
لازم اقوم انفض عن الأوضه الغبار
ملعون الأستسلام
ملعون اليأس والأنكسار
انتفضت زى المجنون أدور على قصاقيصى القديمه
علقت كل الأشعار المبهجه
وحرقت كل الأشعار الحزينه
وفى صور طفولتى..شفت ملامح ولادى
وفى عيونهم شفت عزتى, ثروتى
وشفت مستقبل بلادى
وغرامى اللى لسه ماقابلتهاش
غمرنى عطرها وهو دايب فى نفس نسمه الهوا
مستنى على جمر النار
أقابلها..ونكتب حكايتنا أنا وهيا سوا
ونخلف مريم وياسين!!
وأحفظلها كل أشعار رامى وشوقى
وصلاح جاهين
أنا النهارده عندى أمل ومبسوط
يمكن أكون اتجننت
مش مهم
بس أفضل مبسوط
وحاسس بالبراح
وعقلى يفضل كده
راضى ومرتاح
عارفه يا غرامى..
لما يجى اليوم ونتقابل
لو أشتد علينا الليل
حتكونى أنت قمرى
وأنا المداح
لو الهم فى يوم طالنا
ومرضاش لا يفارقنا و لا ينزاح
لو الشر لكل شئ حوالينا استباح
لو الكون كله ضاق بينا
فى القرب أنا وأنت
وفى أوضه ضيقه زى دى
حنلاقى مع بعض
جوه قلوبنا
البراح
Cairo, April 6th, 2009
هناك 4 تعليقات:
hii,firstly am honored bgd to be the first one 2 comment on this amazin poem....its realy a piece of art,and realy different 4m the others hope thats gonna be ur style 4 all the up comin poems,secondly w ana 3arfa eny zawtaha bs frankly u need 2 propagate ur work akter mn keda i don know ezay bs enta law 3ayez 7aga hat3mlha asln u were 2 shy to allow me 2 read the poems but i think u should let everyone 2 c it and be proud of it..w law msh 3aref to propgate ur work ....SEBHA 3ALYA ANA W ANA HASY7LEK FE EL MANTE2A:),tb3n b3d ur permission,am sorry bgd ana 3arfa eny lesany tweel...
Thanks alot ya zoomzoom :)
حلوة جدا ما شاء الله..عندها روح حلوة و تحسسك إنو مهما كان النهاردة, بكرة جاي و بتاعنا
And thats what we need to get through the day; it fills with hope & excitement for tomorrow...la2 bs eh dah ya doc turns out u r romantic after all..;)
:)Thanks ya Afrah
!Really glad you liked it
إرسال تعليق