النهارده
جبت كيلو برتقان
وقعدت فيه أقشر
وسرحت فى اليوم اللى عدى
وفضلت أفكر
النهارده الصبح صحيت زعلان
ورحت الشغل
وأنا قرفان
لا كنت طايق نفسى
ولا طايق المكان
والساعات عدت لكن بغتاته
الساعه الواحده تمر وكأنها تلاته
والناس فى الشارع كان مالها كده؟
مش على بعضها
عالطول مكشره
و متنكده
والطريق كان دوشه وزحام
ناس بتتكلم
وناس مش لاقيه كلام
بس فى اللأخر أنقضى اليوم
زيه زي كل يوم
هم يعدى
وهم يدوم
وأنا راجع لمحت فكهانى
ولقيت الفاكهه على كل لون
ايشى بلدى
وايشى لبنانى
وقلت للفكهانى هاتلى أحسن كيلو برتقان
ورجعت بيه وأنا شايله كما الشجعان
كأنى ملكت الدنيا
والزمان والمكان
وقلت يا واد دلوقتى تقعد وتمزمز
وتاكل فيه وتتلذذ
وتنسى اليوم اللى انقضى
يوم تانى عدى وخلاص انتهى
لكن بكره أحلى
والله بكره أحلى
وحاتروق وتحلى
أستنى عليا يا زمان
أنا لا ضعيف
ولا أنا جبان
ويكره تشوف منى
أشكال وألوان
وبعد ماقشرت
وقمت مديت ايدى وأكلت
للأسف
بسرعه أفتكرت
أن أنا اصلا من زمان
مبحبش أبدا
آكل برتقان
هناك 3 تعليقات:
this is the best one
OMG... YA doc. de 7etet poemm MAS5ARA .......its soooooooooooooo funny bgd 7lwa awy,bs ana law 7elfoly 3ala el maya tgmed enk enta ely kateb kelmt (eshy) de msh hasd2hom ,hmoot w3rf gbt el kelma de mneen.........loooooooooool
:))
!Ay 7'edma
إرسال تعليق