رباعيات الغريب ٥٥

يا بلدى مرت علينا أيام وعدت علينا السنين

قست قلوبنا على طريق ماشيين فيه كلنا تايهين

فى النهار نتسابق فى الظلم نغدر ونجرح

وفى الليل نبات كل يوم كلنا مجروحين ومهزومين

رباعيات الغريب ٥٤.. يوم الحكم ببراءة مالك العباره السلام

يا موج أوصل الشط وأحكى حكايه عمرى اللى أنقضى 

غريق فى عرض البحر وأنا كنت الأب والأخ والضنا

حتى فى الموت انكتب أكون غريب وبلدى تنسانى

عايش وميت عمال أصرخ وصوتى غرقان مالوش صدى

حكاوي الغريب ٥٣

أنا حر لكنى فى بحور أحلامى بحار أسير

فى النهار أملك الدنيا وفى الليل أعود فقير

غربتى قصتى وفيها أنا وسط الزحام وحيد

ماشى خايف من خطوتى وكأنى طير و خايف يطير

حكاوى الغريب ٥٢

جوه عقلك حتلاقى الجنه والنار

حواليك فى ناس طيبيين وناس اشرار

لو طريقك اليوم مليان شوك

اصبر وبكره تلاقيه مزروع ورد وأزهار

حكاوي الغريب ٥١

انقضى اليوم وأنا لسـه خيالى سـارح

يامحلى الدنيا والورد وهو لسه طارح

راضى أنا كده ومبسوط..بلاش بكره يجى

وأفضل كده..عايش عالطول فى امبـارح!

حكاوي الغريب ٥٠

مل من طـول سكاته وقـرر يـقول كل الـكلام

تهون العيشه لو يفضل عايشها ع الهامش والسلام

لملم يأسه واحباطه.. عجزه فى حياته واخفاقه

ولما نطق...معرفش يقول ايه غير كلـمه..حـرام!

حكاوي الغريب ٤٩

ياصبى لعبـك فين تاهت وضاعت منـك

فين مدرستك وكراستك وصحابك اللى من سنك

صغير ياولداه لكن كتافك شايله حمل رجال

كان بدري عليك تشقى ويضيع فى الزحام حلمك 

حكاوي الغريب ٤٨

هربـت من الضلمه أدور فى النـور على الأمـان

وقفت وحواليا عواميد النور منصوبه زى القضبان

شئ عادى لما أوقـات تخـاف جـدا من الضلمـه

بس الغريب لما تبقى فى قلب النور وتحس أنك جبان!

حكاوي الغريب ٤٧

كان فى عصفور عاش خايف من حاجات كتير

لا عمره جرب يغنـى ولا أتعـلم ازاى يطير

ولما فى يوم قلبـه عـشق لقى نفسه محتار

 يعشق ازاى بعد مافقد حتى القدره على التعبير؟

حكاوي الغريب ٤٦

أخاف بعد ما يخلص من جوايا الكلام والغنا ارجع هادى

وتبهت الألوان من حواليا وتتوه فى اللون الرمادى

خايف أبطل أخاف على بكره و ع الوضع الحالى اتعود

وكل مايضيع منى حلـم احس انه خلاص بقى شـئ عـادى

حكاوى الغريب ٤٥

وأنا ماشى عالطريق غمرنى ضى القمر

كان بدر غطى بنوره نجوم السما في ليله صيف

غمر قلبى الشـوق وحزنـى زال وانقـضى 

وبسرعه من تانى رحل القمر وكأنه كان طيف

حكاوى الغريب ٤٤

خوفى عليك ياصغير من ظلم البشر

من قسوه وفرقه وقلوب زى الحجر 

مشوارك طويل ولابـد راح تمشيـه 

الصبر زادك والصحبه.. ليالى السفر

حكاوى الغريب ٤٣

من بعيد ظهر فى ظلام الليل نور

أمل أتولد عدى جبال وعبر بحور

جاى يرد فى القلوب من تانى نبضها

ولاجاى يحى الأزهار بين القبور؟

حكاوى الغريب ٤٢

قالو أن كلامى حق بس محتـاج زواق

دا مش زمن الصدق دا زمن الزيف والنفاق

سألت ازاى أدارى صوتى وفى صدرى اسجنه

دا أنا لو يوم صوتى انسجن أحس بالاختناق

حكاوى الغريب ٤١

كنت واقف وسط خلق باين عليهم متاعيس

كل واحد قافل على قلبه بميت قفل ومتاريس

بأعلى صوتى ابتديت أغنى والناس قالو مجنون

مجنون يمكن بس أقدر أغنى حتى فى عز زنقه الأتوبيس

حكاوى الغريب ٤٠

فى بحـور الغـربه أنا ياما صارعــت كتير أشباح

بكيـت فى الجنـايـز ورقـصت ياما فـى أفــراح

ليه يا بحر مركـبى تملى تحدفـه دايـما لبعيد

وامتى ترسينى فى يوم على شط عشان أرتاح

حكاوي الغريب ٣٩

يابلدي ولادك ليـه بقوا غلابه

ماشيين وأحلامنا مكسوره فوق الجبين

وكتب علينا الزمن وبقت عاده

نعيش نموت على أرضنا متغربيين

حكاوي الغريب ٣٨

خوفى زرعنى فى ضهر الباب سنين عايش ع الصبر

صيف وراه شتا مروا اليوم فيهم بيعدى وكأنه شهر

وفى يوم دبت فيا الشجاعه وقمت كسرت سجنى وقضبانى

حر بقيت بس ليه حاسس أنى ماليش فى الدنيا ضهر؟

حكاوي الغريب ٣٧

أوعدك انى أحاول أقهر يأسى واصلح جناحى المكسور

 

وأوجد فى الظـلام بالـتفاؤل طاقـه من الأمل والنـور

بس أمانه ياطريـق...بلاش تعاندنى أنا والله طيــب

وكل غايتى أرجع من رحلتى مجبور الخاطر ومسـرور

حكاوى الغريب ٣٦

حلمت وأنا نايم  بحقـول خضرا على مـد البصر

وورود وطيور والشر مالقتلوش أى أثر

اتمنيت اصحى بين الشجر وتحت الفضا ابات

واهجر المدينه...وابعد بعيد عن صخب البشر

حكاوى الغريب ٣٥

يا طريق بتسأل واخدانا لفين خطاوينا

وزى ما كنا ولا المشوار غير كتير فينا

أمانه بلاش تسألنا...سؤالك بيجرحنا 

لو نقدر..كنا نعود من مطرح ماابتدينا

أنا قررت !!

بتسأل أنا قررت ايه؟
أنا قررت انى حبطل أكتب 
وحسيبها مقلوبه 
ومش حقعد فيها أرتب
ولا حاقول ليه وأزاى وعشان أيه
حيفيد بأيه
وحاخد من كل ده أيه؟
قررت أنى حبطل غنا
ولا حيفرق معايا من تانى 
جمال القمر وضيه فى قلب السما

قررت أنى حبطل أشوف 
كل شئ حواليا
بعيون طفل ملهوف
وحبطل أقول وأزيد فى الكلام
وحعيشها زى الناس
واقول اهى عيشه والسلام
حاضر وطيب وماشى 
كلام حضحك بيه على نفسى 
وأن شاالله حتى يكتم أنفاسى

حبطل أتغزل فى النيل
ولاحيفرق معايا من تانى
لاالشعر ولاالمواويل
وابو الهول والهرم وسبع تلاف سنه حضاره
كل اللى حشوفوه قدامى من اليوم شويه حجاره
حتى الصيف والبحر والعشاق
عينى حتشوفه من اليوم كله زيف ونفاق

وخلى اللى يكسر الأشاره
أنشاالله حتى يدغدغها
أصل هوا أحنا كده
مزاج عندنا نزيد فيها ونمسخها

خلى الزباله تحاصرنا
تكتر حوالينا لحد متاكلنا
وخلى الشباب يهاجر وعمره ع الشط ينقضى
شباب بزنود سمرا 
أيه يعنى عمرهم يخلص قبل حتى مايبتدى 

خلى جيرانا تنضرب وتموت
نعيش أحنا بس ومش مهم غيرنا يموت
قررت اخلى الفساد يبلط وياخد راحته
ويدوس بجزمته علينا وأحنا تحته
خليها وحلو قوى على قد كده
شعب وفى بلدنا ضيوف 
وقبل ما ولادنا يتعلموا يمشوا
خليهم يتعلموا الخوف

ودلوقتى
سيبنى فى حالى عاوز أنام
عايز أهرب من الدوشه والناس والزحام
وأحلم من تانى حلم جميل
أشوف بلدى صبيه لسه بتعشق وتميل
وأنا الصبى أتغزل فيها
وأقول مواويل
واتوه فى جمال شعرها اللى طول النيل
ويخطف النور من عينى حلقان الدهب فى ودانها
زيها زى طرح حلقان البلح
على جوانب النخيل
وعطرها ينسينى أسمى

 ويداوى قلبى العليل
وأتشبه بملامحها وأشوف فيها كل شئ 
حلو وأصيل


عاحبك كده
أديك فكرتنى
وللغلب تانى رجعتنى
وأدينى حبات وأصحى 
وألاقى نفسى من تانى مسرور
وابقى عاوز ألف وأدور
وأصلح كل شئ حواليا مكسور
وأنسى أنى فى بلدى غريب 
ومقهور
وارجع أحرق فى دمى
وأعود من تانى أغنى
ومع قله حيلتى وصغر سنى
تصبح من تانى بلدى
هى معشوقتى
اللى عايشه وساكنه
جوه قلبى

Cairo, 25/01/09

حكاوي الغريب ٣٤

ماشى يوم فى سكتى قام طلعلى أسد!!

كان مرعب مخيف الـطله... ضخم الجــسد

لسه حاقوم أجرى..لقيت الأسد قعد يبكى

أتارى حتى الأسد فى الزمن ده...أتحسد !!

حكاوى الغريب ٣٣

الساعات بتمر.. واليوم فى آخره بيعدى وينطوى

وورا الشبابيك المقفوله الناس احلامها بتبتدى 

فى سكون الليل القلوب بتهرب من زحام النهار

تحلم بالفضا ومركب فى البحر بنورالقمر بيهتدى

حكاوى الغريب ٣٢

حدوته حكوها زمان عن ثعبان ومعاه عنكبوت

اتقابلوا فى يوم بقوا صحاب ولا قدر حد بينهم يفوت

لكن الليل غدار وبعد الغروب بتتبدل النفوس

وقبل طلوع الفجر لابد واحد يعيش والثانى يموت

حكاوى الغريب ٣١

يا بلدى على أرضك كام قلب ضعيف مجروح

قلوب مليانه كلام لكن خايفه بألمها تبوح

مهزوم صوت الحق فيكى يا بلدى غرقان فى دمه

بينتفض فى يأسه زى طير على الأرض مذبوح

حكاوى الغريب ٣٠

طابور طويل والخلق واقفين في صمت مخيف

العيون شارده والصوت مخنوق ضعيف

مين حيقدر يثور ويصرخ ويهزم خوفه ويأسه

ويرفض يرضى بالذل والقهر عشان رغيف

حكاوى الغريب ٢٩

اتفرج ياسلام قرب وشوف ازاى بتتبدل النفوس

قرب شوف الأخ بيعمل ايه فى أخوه عشان الفلوس

الدنيا مولد وفيها الطيب مالوش مكان.....

ينام قلبه يحلم... ويصحى من الحلم يلاقى كابوس

الورد والصبار

كانت صبيـه بهيه زى الـورد وهـو مستنــى النهـار

يداعبها الندى كأنه لحن جميل بينعزف على الأوتار

حتى فى السكوت ...العيون كانت بحـور مليانه كلام وأسرار

والدمع كأنه كان دوا يسقى ويطفى فى القلوب النار

وياما كتير أنهزم قدامها وسلم كل قـوى وطاغى وجبـار

غارت منها الشمش وانطفت قدام نورها فى السما الأقمار

حتى الطيور اتعلمت منها الغنا وأتلونت بلونها الأزهار

غدار ليه يا زمن كاتب علينا وعلى الورد ندوب من طول الأنتظار

ونصبح زكرى وقصه ينحكى فيها عن اللى كان وعن اللى صار

تزرعنا على الأرض زى حلم ضعيف بيعافر اليأس والأنكسار

ولا يوم كان بأيدينا تنقلع جذورنا ولا كان لينا فى مصيرنا أى أختيار

ويموت الحلم ويا الورد وينزرع مكانه..... عشب وشوك وصبـار

حكاوي الغريب ٢٨

أعلنت الحرب مع أول نور للصباح!

غلبت خوفى وضعفى...وعزمت على الكفــاح 

وقفت فى الميدان لكن بكيت لما لقيت

بلدى...كل شئ فيها بقى مستبــاح.

حكاوي الغريب ٢٧

مجنـون أنـا وأحتـار لو تسـألـنى أنـا ميـن .....

ماشى وتلاقينى ولا عارف الشمال فين من اليمين

ولما فى يوم أعقل والاقى أجابات لكل الأسئله

أقول طب وكان مالها بس عيشـه المجانـين !؟

حكاوي الغريب ٢٦

حلمى لساه طفل صغير نسيته وبعيد عنى عايش

بقيت أنا كبير وهو ينادى وأنا لاسامع ولاشايف

تايه أنا فى الدروب وهو لسه مستنى اخد بأيده

حلمى نفسه يكبر هو كمان بس أنا عليه خايف

حكاوي الغريب ٢٥

...يا الله  الطغيان هزم نفوس البشر

والظلم انتصر والعدل صوته ضعف وانكسر

يا الله عبادك الدنيا صبحت همهم

مع ان الموت مواعد ميفضلش ليناعليها أثر

حكاوي الغريب ٢٤

كتب القلم على الورق أشعار عمرها سنين 

بكى الناى وعزفت الأوتار لحن كان حزين 

غنى الغريب ليوم فيه من تانى يعود

بعد مشوار طال.... وقلب فاض بالحنين

حكاوي الغريب ٢٣

يا قنديل نورك ليه قرب خلاص ينطفى

قلمى لسه محتار يبتدى ازاى يحكى قصتى 

يكتب عن قصه جيل تاه فى قلب وطن مجروح... 

ولا يكتب عن أحلام كتير انتهت قبل حتى ماتبتدى ؟

حكاوي الغريب ٢٢

ياقمر أنا قلبى خايف يتعود على مراره الأنتظار 

برئ.. لكن بضعفى متهم صعب عليا حتى أبسط اختيار

يا قمر بعيد فى السما نورك فى عتمه الليل قنديل

خايف نورك ينطفى وفى الظلام يهزمنى اليأس والأنكسار 

حكاوي الغريب ٢١

يا بلدى شبابك سلبى... لا بيهش ولابينش

أتعود يـكدب وسهل عليه قوي يـغش

ويمر بيه العمر والشــاب يصبح عجوز

وتلاقيه عالقهاوى فى الذبان لسه عمال بيهش!

حكاوى الغريب ٢٠

لو تحبنى...اعزفلى لحن يـكون مليان شجـن

لحن يهـز جـدران البيـت... ويهـز الروح والبدن

اعزفلى لحن يغمرنى...يخدرنى... ينسينى

كل شئ حوالينا كان غالى واتباع من غير ثمن

حكاوى الغريب ١٩

أنا أصل الحياه سر الوجود وأبن القدر

مديت فى الأرض جذورى وناوى أطول فروع الشجر

شعاع الشمس زادى وقطره المطر تروينى

أنا نبت صحيح صغير لكن قوتى شقت الحجر

حكاوى الغريب ١٨

صحيت النهارده من نومى ولقيت نفسى بضحك

اصلى حلمت حلم ظريف وكل ما أفتكره..أضحك

مشتاق اليوم بسرعه يمر وأنام وأشوف من تانى

حلمى الجميل اللى الناس فيه لسه بتعرف..تضحك

حكاوى الغريب ١٧

فى حياتنا ادينا ماشيين وكل يوم بنتقابل بميت باب

نقف قدامهم فى حيره وخوف وقلق يحرق الأعصاب

نمد ايدينا عشان نفتح و يابخت مين فينا يلاقى...

ورا أى باب فيهم لسه باقي لينا... شويه احباب