رابعة/ رمسيس

رابعة/ رمسيس 

من بعيد..لمحنا الناس عند رابعة متجمعين.. والله وطلعو جدعان !! من يوم التلات والكل خلاص مظبت ساعته على الميدان.. ابتدينا نمشي وسط الناس وكلنا شايلين على كتافنا صوتنا.. نسند بيه بعضنا ونسنده احنا بنوايانا الطيبين....وابتدينا نهتف باعلى صوت ..بلادنا ترابها غالي ...فداها الحياه والموت... وإنت يللي واقف هناك ...واقف عندك ليه ؟ مش مصري حضرتك ولا إيه ؟؟ 

أهم حاجة يا شباب...سلمية ..سلمية... ومحدش يرمي حاجة على الأرض...احنا ناس متحضرين... لو بس مكانوش اللي حكمونا شويه مجرمين ! ..بقولك إيه يا أخ.. ارفعني على كتفك أشوف الناس ورانا اخرها فين.. ياااه... تصدق ماتعرفش تجيب اخرهم... ! كدة تمام ... الكترة فيها الأمان... واحنا أصلاً مش عاوزين حاجة غير نوصل الميدان.. محدش حيقدر يعملنا حاجة... وانتو يللى واقفين في البلكونات .... بصو شوفو زينه الولاد والبنات.. يا أهالينا...يا أهالينا... إنضمو لينا..!!  واللي ميقدرش ، يدعلنا.. مش مالكين من بكرة حاجة غير بس أملنا.... إدعولنا ومتخافوش علينا ...أصلهم قاطعين التليفونات....أما الحكومة بتاعتنا ديه عليها شويه حاجات !! لكن محدش يقلق ..كلو حيرجع سليم أخر اليوم..احنا نازلين مظاهرة سلمية... مش طالبين أي حاجة غير الحرية... عالطول يا شباب...وحودو من هناك على يوسف عباس ... تلاقي إسمه إيه دلوقتي سامع عننا وقاعد في قصره محتاس..

المهم... علو الصوت... سلمية....سلمية...

طلعو علينا البلطجية... !!

بيحدفو طوب !!

حيعمل إيه الطوب يا جبان...

يعني مكفكمش..

تلاتين سنة ذنوب !!

امسك هناك واحد بلطجي أهو... هجووووم.... !!

لأ لأ يا شباب...خليكو فاكرين..سلمية...سلمية... احنا ناس مسالمين...

وصف العسكر اللي على ناصيه صلاح سالم بيقول إمشو شمال ...شمال مش يمين...أصل الريس بيته يمين.... حاضر... على دماغنا من فوق يا عسكر... احنا أصلاً طلعتنا سلمية وطريقنا انشالله للميدان أخضر....إرفعني يا صاحبي أشوف الناس اخرها فين...الناس عمالة تزيد....يلا... ربنا يبارك ويزيد... احنا في عز الشتا بس الناس عطشانه.... لكن لا خايفة ولا تعبانة... قامت ناس من غير ما حد يطلب...جري على محلات عمارات العبور..بكل رضا و فرح و سرور .. راحو إشترو  كل كراتين المية... اللي عطشان ياخد إزازة ويدي أخوه... خليكو كلكم في نفس السكة.. محدش عننا يتوه..

الناس ألوف....لا حد واخد باله مين داقق صليب ولا مين مربي دقنه...مين رابطة الطرحة ومين شعرها بيلمع تحت شمس الشتا ...البنات  يمكن أقل من الولاد لكن البنت منهم بميت راجل...وسط الخلق ماشيين زينه البيوت في عزه وجمال الحمام  الزاجل...كل ما يعلى الصوت تدوب ملامح الناس أكتر في بعضها.. ألوف بتهتف بعلو الصوت... تحكي عن مجد وكرامه أصلها .. الكل واحد... الشعب واحد.. لكن اللي ظلموه كتير...

رجالة بشنبات ودقون ومش طالع عليها غير أنا النهاردة إتأكدت اني راجل !! أنا جدع ..راجل إبن راجل...أنا زي ما بطاقتي بتقول.. ذكر.. يعني راجل...أنا ازاي كنت ناسي اني بحب البلد دي قوي كدة ؟؟...وفضلنا سيبنها طول السنين د ليه كدة حزينة ومتنكدة ؟؟ دة حتى شوف .. الراجل اللي ماشي وسطينا مع إنه معدي السبعين... خليك إنت يا عام الحج احنا نسد عنك... احنا كلنا منك.... وهو مصمم يتعكز على عصايته ويسند عليها ضهره المحني....احنا كمان برغم شبابنا ضهرنا  يا حج كان محني...لكن النهاردة يوم جديد... النهاردة أصله يوم عيد... والبلد لابسة الطرحة عروسة... شوف الخطاب ملايين رايحين الميدان يطلبو ايد المحروسة....إهتفو يا شباب ... علي وعلي وعلي الصوت...مصر بلدنا مش حتموت..


علي وعلي وعلي الصوت...مصر بلدنا مش حتموت..

شوفو بقى... الشعب ...يريد...إسقاط النظام... الشعب خلاص... تعب من كتر الكلام... وصلنا العباسية ناحيه أول شارع رمسيس... تعبو الناس بس مصر غالية وتعبنا عشانها رخيص....بس أصل الناس نسيت تفطر.. !! يوم الجمعة بقى كلو صاحي يادوب على معاد الصلاه ...وماشيين تكالهم عليك إنت بس يا الله.. ..

يا رب ابعت !!


 الحق ..!! الناس بترمي أكل من الشبابيك....عيش ..مولتو . سندوتشات.. كياس شيبسي بالجبنة !!.أحمدك يا رب !!. طب مفيش شيبسي بالملح ؟؟ وناس باين رمو كل حاجة مفضلش غير كياس اندومي حدفوها علينا... وصاحبي قعد يقرقش في المكرونة الناشفة ويمص في كيس الزيت والبهارات !!  تقلش بياكل كنافة غرقانة عسل ؟؟ الشعب دة طول عمره... في الشدة... بطل !!

قربنا على غمرة ...يادوب رمسيس وبعديه التحرير.. لكن إيه صوت الدوشة دة ؟ دة زي ما يكون صوت ضرب !! وإيه الدخنة دي ؟ زفت مسيل للدموع تاني ؟؟ طيب الأمن بيضرب في مين ؟؟ بيضرب مصريين ؟؟ وناوي يضرب الملايين ؟؟ لأ يا شباب ..متخافوش... سلمية ...سلمية...معلش أصل احنا بردو سكتنا كتير على الحرامية ... وبعدين دة احنا يادوب بتوع مدينه نصر بس... حتلاقي من الناحية التانية جايين لسه ألوف... من الجيزة ...المعادي ...وسط البلد..جامعه الدول...العجوزة ...كله جاي ملهوف.. حيحصل إيه ...حيضربونا كلنا ؟؟ حيموتونا كلنا ؟؟ لو التليفونات شغالة كنا كلمنا اللي منزلش ينزل .....الأمان في الكترة.. وربنا رب القدرة... خلي بالكم من البنات....كلو إلا شعرة واحدة من راس البنات.. 

نقرب على ميدان رمسيس ...

وعلب الغاز تنزل علينا زي المطر

ميد إن يو- إس- إيه ...!

 يا كلاب شغالين عند أسيادكم البقر..

بتضربونا ليه؟ خايفين مننا في إيه ؟؟ دة احنا صوتنا إتنبح... سلمية ..سلمية !!

ممعانش سلاح .. و كل ما نقرب الضرب يزيد ... شايلين على كفوفنا قلوبنا ....وهما بيضربونا بالحديد..!

ومن الغاز العيون بكيت انهار..... وصدور من الخنقة والدخنة اصحابها على الأرض تنهار.. ..بيقولو التوانسة قالو الحل في البيبسي والخل... تغسل وشك بيهم ترجع زي الفل !! لا يا عم أنا كويس...مش بحب ريحه الخل ولا التلزيق... أنا بس صدري اللي تاعبني... النفس مش راضي يدخل... يا ولاد الكلب حنموت... احنا اخواتكم مش يهود...!! 

بقولك إيه..خليك معايا... بلاش نتوه من بعض... حد فينا ولا احنا الاتنين ننصاب نبقى نتسند على بعض.. يا ترى اللي وصلو التحرير حصلهم إيه... ليه يا مبارك الشعب كان بس عملك إيه ؟؟ 

الحق ...حاسب...اجري ...لأ استنى... بلاش نتوه من بعض...يا مطاوع ...يا محمود... !! يا رب محد يكون إنجرح... أعمل إيه أنا طيب وأنا لوحدي... ؟ الناس ازاي بقت شجاعة كدة... الكل بيجري على النار ...الكل خلاص بقى صاحب تار... سلمية ..سلميه.. ولاد الكلب خلوها خلاص حرب رسمية...

الله يلعنك يا سجان ...سبحان من وحد الخلق على كره واحد... .واحنا نموت نعيش نتمنى نتحب ولو بس من بني أدم وحد.

صرخو الخلق... قلب الوطن بيموت...!!  لأ يا شباب ... قلب الوطن اتولد ...لما مات....قلب الوطن نطق...لما خرصوه ...اتكلم و قال ..النهاردة غير كل اللي فات... شوفو ولاد البلد والبنات...على الميدان طايرين... وسط الرصاص والدخان جايين...ولادي أنا عارفهم...دول مش خايفين... دول أصلهم مصريين...

ردو الناس..يا قلب الوطن ....بحق الدم اللي ساح ...بحق الشهيد اللي راح...بحق الألم....بحق ناس عايشة على العدم....بحق اللي بكى ومتسمعش ...بحق اللي هاجر... ومرجعش...بحق اللي حاول كتير...لكن مقدرش..بحق عيال مصاحبة السرطان ...بحق أحلام طفولة ماتت من زمان... بحق المهانة ...بحق إنهدار الكرامة....بحق الصبر كما صبر  أيوب... بحق اللي باع نفسه و وملحقش يتوب... بحق اللي ماتو محروقين ...بحق اللي ماتو غرقانين....بحق امبارح والنهاردة و بكرة ...بحق الغيبوبة والسكرة..

 بحق حروف اسمك يا بلادي..

بحق الحمول والقسية 

بحق كل ولادك الجدعان..

لو يموت مننا ألوف...

فداكي قدهم ملايين..

وتيعيشي انتي

قلبك ينبض في الميدان

والشهدا في السما يغنولك

تعيشي يا مصر وتبقي لولادك..

سلمية ...سلمية..

تلك الشجرة في الزاوية الجنوبية

جلس على اعتاب الحديقة الصغيرة المحيطة بالمنزل. لأول مرة يلاحظ أثر الخريف على الأشجار. تبدو وكأنها تضاءلت وانكمشت بعد أن كادت توشك أن تبلغ السحاب طولاً.
لطالما كان يظن في صغره أن باستطاعته أن يلامس السماء, ويكلم الرب , إذا ما تسلق شجرةٍ بذاتها في الزاوية الجنوبية من الحديقة. تبدو تلك الشجره الآن بلا أوراق....هيكل مقفر بلا روح.

تباً لفصل الخريف هذا. البيت الكبير يبدو الآن هو الأخر صغيراً جداً. تغير كثيراً برغم أنه لا يزال على حاله القديم. كيف يبدو المكان مختلفاً برغم أنه لم يزد أو ينقص فيه شيئاً ؟ الأنور مطفاه , والستائر مسدلة. يبدو البيت متأثراً هو الأخر بفصل الخريف.

أشعل آخر سيجارة في علبته. يكره التدخين ويعشق دخانه. يحلو له أن يتخيل نفسه يذوب في أطياف الدخان وهي تعلو بخفة لتعانق السماء.

اضيئت أنوار إحدى الغرف. لمح شبحاً يتحرك من خلف الستار. استيقظت فجأة ولم تجده بجانبها .تسمرت في مكانها من وراء الستار. كأنها تراه برغم الظلام الدامس.
مرت لحظات... هي من وراء الستار وهو من وراء سحب الدخان. أحس بوطأة الصمت المتبادل برغم المسافة بينهما . كلاهما ينظر إلى الآخر ولا يراه. كلاهما ينادي على الآخر ولا يسمعه. يتذكر الآن أول مرة رآها. يتذكر ذلك الفستان الذهبي العاري بعض الشيء ,وتلك اللآلئ التي زينت صدرها. يتذكر بعضاً من أشعار نزار قباني التي كانت تعشقها وكان هو يتلوها عليها عند تلك الشجرة في الزاوية الجنوبية.
طال الخريف الذكرى هي الأخرى و أذابها في سحابة الدخان المنبعثة من جثة السيجارة المحترقة بين أصابعه.
نظر إلى شبحها مرة أخرى..أغلقت هي الأنوار وأدرك أنها عادت إلى سريرها. لا تعرف أنه دائماً ما يستيقظ عندما تصحو هي في تلك الساعة المتأخرة من الليل لتجلس في ظلام الغرفة في صمت للحظات قبل أن تعود إلى نومها. أراد كثيراً أن يعلمها أنه مستيقظ هو الأخر.

لم يفعلها قط...

جلس ينفث آخر أنفاس السيجارة في غضب لم يعرف له سبباً. تكره هي رائحة فمه عندما يدخن.
أدرك فجاه أنه لم يعد باستطاعته بعد الآن أن يحلم بتسلق تلك الشجرة , يلامس السحاب ويكلم الرب. خذلته أحلام الطفولة على ما يبدو. جلس ينظر إلى الشجره ويسترق النظر إلى الشباك بين الحين والآخر. بداخله, تمنى في يأس أن تضاء الأنوار مرة أخرى. شعر بالوحدة تغمره كسحابة دخان خريفية تسلب منه روحه وأوراقه وتتركه كهيكل تلك الشجرة في الزاوية الجنوبية من الحديقة.

تمت

مين دول يا مصر..؟

مسنود يادوب

بحبة نوايا طيبين...

مبقاش فاضل فيا

غير الذكرى

و شعور فياض بالحنين...

مبقاش فاضل غير شوية ورق

قناديل من غير ضي..

وضحك من العيون اتسرق

ما بين الخوف والشجاعة..

بتدق بقسوة من حوالينا

عقارب الساعة

وقلق مدوب القلوب بالخوف

وحقيقة زي الشمس

وعيون خايفة تفتح.... لتشوف

الخوف الحقيقي

من الوشوش الساقعة الازاز

والعقول المتبرمجة

المتحجرة

المسجونة في حتة برواز

مسنود يادوب بقولة كنا وكان

مكتوب نتغرب في دروب أحلامنا

ونصبح كل يوم من تاني

نلاقي روحنا في نفس المكان

كل واحد شايل على كتافه سؤال

زلزال...

وجواب مش لاقينا عمال ينادي

وهو مربوط متكتف بسلسال

راح فين الكلام..؟

كل يوم تموت جوانا كلمة..

كلمة حب... كلمة أمل..

وقناديلنا بتنطفي ....

ويغمرنا بعنف إحساس الضلمة

راح فين بياع الضحك والمواويل

وحط علينا امتى الهم التقيل

ومين دول يا مصر..؟

والجنازة ماشين فيها ليه ..

اللي قتلو القتيل

My first photography exhibition

أربع جدران

كل اللى طلع بيه من الدنيا

أربع جدران

سجن...

من غير قضبان

قبر انتحرت فيه الألوان

أربع جدران شايله براويز من غير وشوش

خيالات بنى ادمين

ملامح صور من غير رتوش

أربع جدران اختصر مابينهم حياته

جدران محبوس فيهم صدى تنهيده

وآهاته

أربع جدران سجنوا معاه الخوف

سلبوا منه عقله وفكره

حلمه..

والضى اللى عنيه بيه بتشوف

أربع جدران تاه مابين جوانبهم الأمل

جدران شهدت على جروح

طابت جروح البدن

لكن جرح الضمير ولا عمره اندمل

أربع جدران

ترابيزه

ودولاب

وسرير

فناجين قهوه على حالها

شايله بواقى سهر خلاه فى ملكه

وفي لياليه

أسير

أربع جدران وشباك

وأصوات جيران من بعيد

لا حد منهم فى يوم زار هنا

ولا يوم فكر يزورهم هو هناك

أربع جدران ومابينهم مسافات

دروب وبلاد

جبال..

وبحور مليانه سؤالات

من سنين على حالها

لسه مستنيه

تلاقى اجابات

أربع جدران وشعر شاب قبل الأوان

عمر اتباع رخيص

عدى من دون وعى

من دون اتزان

أربع جدران فى آخر الزمان

انقرضوا الوحوش

ماتو البشر

أتغير المكان

ولسه منصوبين

الأربع جدران

جواهم..زكرى أنسان

مطلعش من الدنيا

غير يادوب

بأربع جدران

08-07-09

نشيد الصباح

صباح الورد

والفل

ويوم جديد علينا بالبركه بيهل

أبواب كتير متقفله

لكن الشبابيك مفتوحه

من وراها أمل

مواعد النهارده يطل

صباح الأبتسام

والأنسجــام

ويوم مبهج متلون بريشه رسام

صباح جميل

مهما نوصف

ونقول كلام

برضه قليل

صباح فواح

بريحه المنجه والبرتقان

والفراوله والتفاح

صباح شقاوه

سمار وحلاوه

ولاد معفرته

وبنات نقاوه

صباح حريه

تبقى يا بلادى حره

صبيه

وفى عمر الزمن أبديه

صباح الضى

على عيونك يابركه

يا نواره حتتنا

ياعم عبد الحى

صباح الخير

ابعتلنا رزقنا يارزاق

على جناحات الطير

صباح أشعار

حبه كلام جد

وكلام كتير هزار

صباح الملك لله

نعيش الفرح

والحزن ننساه

ونسافر فى ترحالنا

توكلانا فيه عليك يا كريم

يا رحيم

ياألله

09-07-09

حكاوى الغريب ٥٩

بتمر الساعات وتضيع ملامحها فى آخر اليوم

لا الفـرح بيـفضل..ولا الحزن كتير بيدوم

عمرنا يادوب قصه يحكيها زمنا من بعدنا

وحيفيد بأيه تفضل باللى راح ياولد مهموم؟

الضى

مد أيدك...المس الضى
رد وقال..بس أنا أخاف..
تحت الضى الاقى حياتى مبقاش ليها معنى
مبقاش ليها أهداف
أخاف الضى يكشفنى
تشوفنى الناس وتعرفنى
وأنا تعبت من كتر الكلام
ومن كتر السؤال عن الى جرى
والعتاب والملام
تحت الضى.. أخاف أشوف بلادى معرفهاش
واسمع عن خطط ووعود مفهمهاش
فى الضى... دا أنا ممكن أتوه
والزمن دا غير الى فاتنا
الأخ فيه دلوقتى مبيعرفش أخوه
خلينى كده
عايش فى حمايه احساسى الدائم بالخطر
وقلبى زى قلب بلدى... صحرا
نادر لما ينزل فيها شويه مطر
فى الضل بقالنا كتير عايشيين
بالبركه..والحيله
وبجيوب من تالت يوم فى الشهر فاضيين
وادينا عايشيين
للقمه العيش بقينا عبيد
مشوارنا نمشيه طرق مكسره
تنرسم على وشوشنا وفى عز شبابنا... تجاعيد
عايشيين بس نسينا عايشيين ليه
كتير بنبكى
وننسى يعدها ايه حتى اللى كنا بنبكى عليه
الضل بيدارينا من بعض
كل واحد فينا زى العصفور اللى جناحه مكسور
فى الضى تلاقيه خايف
يبقى صيد سهل
ويقابل على كل طريق 
كلب مستنيه
وهو جعان ومسعور
عارف..تحت الضى
أخاف ملامحى تكون أتغيرت
اتأثرت
الضل اللى ساكن فى قلوبنا زى السجان
مرعب..مخيف
ويخلى اجدع واحد فينا...جبان
حنعمل أيه فى الضى
خلينا فى الضل مستنيين
عابشيين فى طابور أنتظار
طابور انكسار
اندثار
خلينا فى الضل
بعيد عن الضى
ومحدش يدرى بينا
ولا يدرى مين فينا من زمان مات
ولا مين فينا ...لسه حى

عصفور

واقف ورا الباب
ومش طايل بأيدى
قالو أستنى... خليك صبور
بكره تفوت من الباب
وتلف الدنيا وتدور
وتبقى صاحب مركز
ومنصب مشهور
قاضى أو مهندس
وياسلام لو تبقى دكتور
أنت العوض
مين غيرك
يرجع الحق المهدور
ويصلح كل شئ جوانا بقى مكسور
بكره...
أسمك ينكتب بحروف من نور
ووسط الخلايق
تقف وكأنك مارد جسور
تهد بأيدك الحبال
وتعدى البحور
بس أنت خليك صبور
وصبرت..ومرت سنين
لحد ماكبرت.. وفى يوم
مديت أيدى..وطلت الباب
فتحت...لقيت سور!
غريبه
كان كل حلمى
ببساطه..الحريه
وأنا..
أبقى يادوب عصفور!

حكاوي الغريب ٥٨

طـول النهـار للشــاى والـقهوه بقـيت أسـير

دوبنى هـم الشـغل وزهقت من دوامـه المشـاويـر

أحساسى أختلف وكأنى ثور فى ساقيه كل همه العلف 

ياميـن يقولـلى,هى دي الوسيـله..ولا دا الـمصير؟

لو بتحبنى...

لو بتحبنى...

ازرعني على الأرض نــبت صغيرأخـضر

بكره أطرح ورد بلدى ولونه أحمر

ا زرعني فى قلب السحاب حبه مطر

وراك لحد ماتدوب يالى قلـبك تملى حجر

ازرعني فى البـحر موجه رحـاله

مسافر لبعيد ورجوعى للشط...استحاله

ازرعني فى الـسما طير عمال بيـغنى

جوايا غناوى كتير بتجرى فى دمى وجوه منى

ازرعني ع الطريق اجابه لكل سؤال

جواياأحلام لا تكفيها البحور ولا الجبال

ازرعني فى وسط البشر قلب أبيض حنـون

ومش مهم لو حتى قالو عليا أكيد مجنون

ازرعني نجم عالى فوق بعيد فى الفضا

نوره يمكن ضعيف لكنه حاسـس دايما بالرضا

ازرعني فى العيون شوق قايد وملهوف

يحتار يعبر وقال يعنى خجول وعامل مكسوف 

ازرعني فى البيوت ضحكه عاليه تجلجل

تبـشر بالأمـل وللفرح ترقـص وتـهلل 

ازرعني فى طفل جميل نايم حلم مسكر

بطعم الشوكولاته والمنجه وفتافيت السكر

ازرعني فى الدنيا دى مجرد ضيف

أعيشها أيام وأفارقها وأصبح طيف

ازرعني حرف من حروف أسم بلادى

فداكى عمرى وروحى وانكسار فؤادى

لكن لو بجد بتحبنى... يكفينى

تزرعنى جنبك وتقربنى مـنك

ولا تبعدنيش فى يوم أبدا أبدا عنك!

 

كفايه علينا بكره

كفايه علينا بكره

وأنا وانتي

وحلاوه الفكره

بأن بكره أحلى

ومن بين كل الأيام

حيبقى أغلى

مش مهم اللى راح

بكره يطل الصباح

وناخد من الفرح مواعيد

ومع ولاده شمس بكره

نتولد أحنا كمان معاها من جديد

كفايه علينا بكره

نجرب فيه من تانى

نتقابل هناك

عند الضليله

تحت الشباك

وبدون ما نتكلم نقعد مستنيين

ويدوبنا الشعور بالحنين

واخر اليوم نتواعد

مهما يفرقنا الليل ونتباعد

نتقابل تانى...لما يجى بكره

كفايه علينا بكره

نمد فيه الخطاوى

ونسافر لبعيد

لدنيا الحكاوى

ونقابل راجل حكيم

ماسك فى أيده قلم وكتاب قديم

ويسألنا..أنتو مين؟

وفين رايحيين

ونرد..مش عارفيين

أدينا ماشيين

بس أملنا..نعرف بكره!

كفايه علينا بكره..

نقضى فيه بقيه عمرنا

نجرب من تانى

نحقق حلمنا

وفى بحر اليوم

يغمرنا يأسنا

ونغمره أحنا بفرحنا

وبسرعه يخلص اليوم

ونقول مش مهم

كفايه علينا بكره

هو اللى فاضلنا.

Cairo, April 18th, 2009

البراح

النهارده..ومن غير سبب

أوضتى الضيقه لأول مره

أحسها براح

وكل همى وقلقى

فارقنى فى لحظه

وعقلى أرتاح

وبدل بهتان الحيطان

نطقت فى الأوضه الألوان

وبرغم سنين التوهه والضياع

حسيت انه بقى ليا فى الدنيا دى أسم

لأ وكمان عنوان

وبعد ما كان عالى صوت السكات

قلبى بقى مليان حكايات

قلبى لسه عايش

وبقوه بينبض

ومبقتش حاسس خلاص

أنى من كل شئ خايف

واتمايلت ستاير شباكى لما دخلت نسمه هوا

رقصت كأنها عشقانه وهيمانه بكل خفه ودلع

أأأه يازمن

وأه من القلب اللى يامااتوجع

جيتى منين يانسمه الهوا؟

ولفين الحياه واخداكى؟

أمانه عليكى لو تروحى

خدى كل يأسى وحزنى وأحباطى معاكى

وسمعت مرايتى بتنده عليا

واتاريها عرفتنى!!

برغم كل شئ اتغير فيا

أمال أنا ليه مبقتش عارف نفسى؟

طب أدينى قلعت كل هدومى

أدى عيونى وكتافى وايديا

وأدى قلبى اللى جوه صدرى وآدى رجليا

طب أنا لو لسه ملامحى ملامح أنسان

كان قاسى ليه كده الزمن عليا؟

لأ..

لازم اقوم انفض عن الأوضه الغبار

ملعون الأستسلام

ملعون  اليأس والأنكسار

انتفضت زى المجنون أدور على قصاقيصى القديمه

علقت كل الأشعار المبهجه

وحرقت كل الأشعار الحزينه

وفى صور طفولتى..شفت ملامح ولادى

وفى عيونهم شفت عزتى, ثروتى

وشفت مستقبل بلادى

وغرامى اللى لسه ماقابلتهاش

غمرنى عطرها وهو دايب فى نفس نسمه الهوا

مستنى على جمر النار

أقابلها..ونكتب حكايتنا أنا وهيا سوا

ونخلف مريم وياسين!!

وأحفظلها كل أشعار رامى وشوقى 

وصلاح جاهين

أنا النهارده عندى أمل ومبسوط

يمكن أكون اتجننت

مش مهم

بس أفضل مبسوط

وحاسس بالبراح

وعقلى يفضل كده

راضى ومرتاح

عارفه يا غرامى..

لما يجى اليوم ونتقابل

لو أشتد علينا الليل

حتكونى أنت قمرى

وأنا المداح

لو الهم فى يوم طالنا

ومرضاش لا يفارقنا و لا ينزاح

لو الشر لكل شئ حوالينا استباح

لو الكون كله ضاق بينا

فى القرب أنا وأنت

وفى أوضه ضيقه زى دى

حنلاقى مع بعض 

جوه قلوبنا

البراح 

Cairo, April 6th, 2009

 

خط السير

جربت مره أنك تقلع الجزمه

 وتمشى ع الشط وأنت حافى

ويغازل فيك الموج الساقع

وهو بيجرى مشتاق للرمل الدافى

جربت تقلع هدومك كلها

وتاخد حمام قمر؟

وتصدق أنك ملك السما والأرض

والزرع والشجر

طب بلاش

جربت مره وأنت وسط ناس مكشره

تحلم أنك نطيت فى قلب المحيط

وفضلت تعوم وتعوم

لحد ما تنزل لتحت فى الغويط

وتطلع من وراك سمكه وتقولك بخ!!

وتفوق وأًنت ميت من الضحك واللى حواليك يقولو

دا يأاما أهبل..يأما عبيط

طب جربت مره تشوف نفسك مارد جسور

عاشق

وعروستك ست بنات الحور

وتاخدها فى ايدك وتلف بيها الكون وتدور

وآخر النهار تحت ضى القمر

تقطفلها من السما حبه نجوم

وتبقى خيبه ومكسوف ومتلاقيش كلام تقوله

غير مقسومه أنتى ليا

وأنا ليكى مقسوم

بلاش

جربت وقت الجد

تقول كلام مجنون

ولما الناس حواليك قلبها يقسى

تفضل أنت قلبك حنون

جربت تعيش فى صحرا لا فيها زرع ولاشجر

 وتتعلم تصبر وتستنى

يوم ينزل فيه المطر

طب جربت تمسك مره فرشه ألوان وتبقى رسام

وبدل الصور

ترسم المشاعر المستخبيه بين ثنايا الكلام

جربت تصدق أنك ببساطه تقدر

الكون اللى مليان دمار وضجيج وعذاب

تلونه أنت بألوان السلام

جربت بدل ما تتوقع الشر

تتمنى الخير

وتشتاق لأذان الجامع

ورنه أجراس الدير

جربت مره فى عمرك

وقبل ما العمر بيك يعدى

والقلب نبضه يهدى

جربت مره

أنك تغير خط السير؟

حكاوى الغريب ٥٧

كــل يوم أبتـدى صفـحـه جديـده تقـوم تسـود

أحـط طوبه فـوق طوبـه واللى ابنـيه يقـع ينـهد

لكن من قلب الليل بيتولد نهار مواعدنى كل يوم

يبعتلى بدل الفرص الضايعه..فرص اكتر صعب حتى تنعد

حكاوى الغريب ٥٦

كلامنا كتير لكن ارادتنا بقت ضعيفه

ناس مطيعه لطيفه راضيه بعيشتها وأليفه

يادوب نشجب شويه وندين شويه ونرجع بسرعه

نقف وشنا فى وش الحيط زى عساكر التشريفـه!

رباعيات الغريب ٥٥

يا بلدى مرت علينا أيام وعدت علينا السنين

قست قلوبنا على طريق ماشيين فيه كلنا تايهين

فى النهار نتسابق فى الظلم نغدر ونجرح

وفى الليل نبات كل يوم كلنا مجروحين ومهزومين