حكاوى الغريب ١٦

أنا كل شويه أقوم من مكانى وأجرى أهرب

وأقعد أصارع فى أشباح وأفضل فيها أضرب

زهقت..وطقيت...هـو أنا يعنى لحد أمتـى

حافـضل كده متعـفرت دايما.... ومتكهرب ؟

حكاوى الغريب ١٥

أتفرج يا سلام قـرب و شـوف الواد الجدع

قرب تعالى ارمى بيـاضك ووشوش الـودع

الدنيا مولد و فيها المتعوس يعمل أراجوز

يعشها جرى وتنطيط فى زمن غدار يعشق البدع

حكاوى الغريب ١٤

أنا ظالم.... وتلاقينى أصرخ وأقول يا ناس أنا مظلوم

صوتى عالى وأنا بطل وعالى كمان وأنا مهزوم

بانى حواليا سور خايف أفتح صدرى الناس متلاقيش غير

عشق ومحبه وحته قلب أبيض بأيد طفل مرسوم

مش عارف !

مش عارف...

أقول اللى فى نفسى

ولا أخبى

ووقت الجد

أقف مكانى

ولا أجرى

مش عارف...

 

ليه الناس عاوزه تاخد

بس مش عايزه تدى

وسهل الكل يهد

ومحدش عاوز يبنى

مش عارف...

ليه بقى صعب نضحك

وسهل قوى نبكى

ومش عارف أنا ليه

ساعات الفرح بيكون كأنه

مش على مقاسى

ولا على قدى.

حكاوى الغريب ١٣

كانت فى ورده تعشق الهوا والنسيم العليل

دابت فى ايدين عاشق سهران بيغنى مواويل

لا حن القمر ولا رضى يميل..وفضلو لوحدهم

أتنين مساكين وحظهم فى الدنيا دى.. قليل

حكاوى الغريب ١٢

لو بأيدى كنت أعود طفل اجرى ع الأرض وأمد

وقصور على الرمل أبنى فيها و اهد

وأيامى تصبح أحلام أرسمها على الجدران

وبخيالى أوصل الفضا واقعد فى النجوم اعد

حكاوى الغريب ١١

كفاياك خوف و مذله ... امتى حتصرخ و تثور ؟

وتنفض غبار الكسل عنك وتبطل تلعب دور المقهور

كفاياك كلام وشكوى وحتفضل تتكلم لحد امتى ؟

عمر الكلام ما حيزرع أرض أنت سبتها تبور 

حكاوى الغريب ١٠

نادى البحر على الغريب من تانى يرحل 

يهجر الشط يسافر يبعد بعيد

من غير وداع على مركب عمال بيسأل

ليه كل مانرسي نعود نتغرب من جديد؟

حكاوى الغريب ٩

عشت عمرى حزين وكأنى فى الفرح ماليش

تايه ما بين خوفى وضعفى وقلق مبينتهيش

..ولما وصلت لأخر المشوار بكيت لما لقيت

! عمرى أنقضى قبل حتى ما أتعلم أزاى أعيش

حكاوى الغريب ٨

أنا شفت قرد مقضى وقته فى اللعب والفط والتنطيط

لا فاهم فى أمور الموازنه ولا ليه فى نظم التخطيط

عايش بسجيته وأنا حتى فى المنام عقلى يبات حيران

مش عارف مين فينا...أنا ولا القرد اللى أهبل وعبيط !

حكاوى الغريب ٧

قدام عينيك ناس كتير مشتاقه للحظه سلام

و ورا الشبابيك المقفوله عيون ياما مخاصمها المنام

فى دروب المدينه حتلاقى زحام و ناس غلبها الصمت

نفسها تنطق .... لكن القلوب عز عليها حتى الكلام

كيلو برتقان !

النهارده

جبت كيلو برتقان

وقعدت فيه أقشر

وسرحت فى اليوم اللى عدى

وفضلت أفكر

النهارده الصبح صحيت زعلان

ورحت الشغل 

وأنا قرفان

لا كنت طايق نفسى

ولا طايق المكان

والساعات عدت لكن بغتاته

الساعه الواحده تمر وكأنها تلاته

والناس فى الشارع كان مالها كده؟

مش على بعضها 

عالطول مكشره

و متنكده 

والطريق كان دوشه وزحام

ناس بتتكلم

وناس مش لاقيه كلام

بس فى اللأخر أنقضى اليوم

زيه زي كل يوم

هم يعدى

وهم يدوم

وأنا راجع لمحت فكهانى

ولقيت الفاكهه على كل لون

ايشى بلدى

وايشى لبنانى

وقلت للفكهانى هاتلى أحسن كيلو برتقان

ورجعت بيه وأنا شايله كما الشجعان

كأنى ملكت الدنيا

والزمان والمكان

وقلت يا واد دلوقتى تقعد وتمزمز

وتاكل فيه وتتلذذ

وتنسى اليوم اللى انقضى

يوم تانى عدى وخلاص انتهى

لكن بكره أحلى

والله بكره أحلى

وحاتروق وتحلى

أستنى عليا يا زمان

أنا لا ضعيف 

ولا أنا جبان

ويكره تشوف منى 

أشكال وألوان

وبعد ماقشرت

وقمت مديت ايدى وأكلت

للأسف

بسرعه أفتكرت

أن أنا اصلا من زمان

مبحبش أبدا

  آكل برتقان 

حكاوي الغريب ٦

غنوا زمان عن قلب غلبه الخوف فى موال

غابه عاش فيها أسد قضى عمره يطارد غزال

وفى يوم مات الأسد لكن الغزال فضل يجرى

يموت الصياد لكن يموت معاه الخوف..محال

حكاوي الغريب ٥

رسام فقير وكل اللى أملكه فى الدنيا دى ألوانى

أحب أرسم الطير فى السما بيطير وأرسم جنون أحلامى

وفى يوم بصيت فى المرايا عشان أرسم نفسى واستغربت

 لما لقيتنى برسم واحد تانى غيرى أنا واقف مكانى !!

حكاوي الغريب ٤

صوتى هجرنى وزرعى حصدته هم وكبد

وحيد على أرضى واقف من غير لا ضهر ولا سند

مهزوم وأنا فى قوتى أبات وأصحى وانا خايف

ومبقتش عارف أزعل منك... ولا ازعل عليكى يا بلد

حكاوي الغريب ٣

حزين ياقطر الليل يا مسافر على قضبان حديد

مسجون على طريق لا يوم بينقص.. ولا بيزيد

وأول ما توصل محطتك والطريق بيك ينتهى

يهل النهار و يعود مشوارك يبتدى من جديد

حكاوي الغريب ٢

يا عصفور ازاى لسه قادر تغنى 

والقضبان حديد والسما بعيده عنك متداريه

وجناحك انكسر والعمر بيك بيعدى

! عايش سجين ولسه بتغنى للحريه

حكاوي الغريب ١

القلوب من تانى عشقت لما الشتا رحل

والطيور غنت والأرزاق اتقسمت

والغريب نسى فى لحظه غربته لما رآى 

عيون صبيه من بعيد اتبسمت